O prezo do petróleo volve marcar (en euros) o récord histórico de 2008

Ofrecémosvos traducido un artigo publicado o pasado martes no blog Oil Man de Le Monde, no que se nos fai ver como a depreciación do euro fronte ao dólar desde 2008 fixo que —contados na moeda europea— esteamos de novo nos maiores prezos da historia. A tradución de urxencia é de Xoán Doldán:

En euros, o prezo do petróleo cru iguala os rexistros de 2008

Calculado en euros, o prezo do cru situouse no récord de 2008. O prezo do barril de Brent do Mar do Norte superou os 88 euros a semana pasada, un nivel alcanzado apenas unha vez hai tres anos e medio, no auxe da crise do petróleo.

Evolución do prezo do barril de Brent, en dólares e en euros
Brent, en euros, volta para as alturas de 2008 [Petromatrix] [ftalphaville.ft.com]

A caída do euro fronte ao dólar e a continuidade, a pesar da crise económica global, dos prezos elevados do petróleo “combinaranse nun bico da morte para a demanda europea de petróleo, mais tamén para o consumo europeo en xeral (…) xusto cando as medidas de austeridade entrarán en vigor”, profetiza o gabinete de análise suíza Petromatrix, citado polo site do Financial Times.

A cotización do Brent está estancada alén dos 110 dólares, mais aínda lonxe dos 140 dólares superados a mediados de 2008. “A zona do euro atópase completamente disociada do resto do mundo en termos de custos de enerxía”, di Izabella Kaminska, do Financial Times.

En 2011, a factura petroleira da Unión Europea ascendeu a 402.000 millóns de dólares, contra 280.000 millóns en 2010. Un salto que debe moito á fraqueza do euro fronte ao dólar. 402.000 millóns de dólares (315.000 millóns de euros) é case o importe da débeda pública grega.

O director xeral de Total, Christophe de Margerie, advertiu o ano pasado que é “inevitábel” que o prezo dun litro de super chegue a 2 euros. “A verdadeira cuestión é: cando? Esperemos que isto non aconteza moi rapidamente, en caso contrario as consecuencias serán dramáticas”, dixo ao Parisien. No momento da entrevista, en abril de 2011, o prezo do Super 95 foi de 1,53 euros por litro. Fica preto agora do 1,60 euros de media [en Francia].

Segundo o economista-xefe da Axencia Internacional da Enerxía (AIE), Fatih Birol, os altos prezos da enerxía “se persistiren nos próximos meses, poderían facilmente estrangular calquera recuperación económica.”

A Unión Europea vai superar aos Estados Unidos no primeiro posto dos importadores de cru en 2015, e será á súa vez superado por China en 2020, prevé a AIE. Isto “colocará á UE e China na primeira liña diante da seguranza enerxética”, subliña Fatih Birol.

Mentres tanto, o refinador suízo Petroplus, nun estado de case colapso, está lonxe de ser hoxe o único ameazado pola redución das marxes, observa Olivier Jacob da Petromatrix.

Neste contexto, a intención dos países europeos para impor un embargo de petróleo iraniano é temeraria (se non “xesticulatoria“). Se houber novas sancións occidentais contra o seu programa nuclear, Teherán ameaza bloquear o Estreito de Ormuz, a través do cal transita unha quinta parte da produción mundial de cru. Sen considerar este extremo, a tensión dos custes do petróleo é suficiente para levar a unha rúa sen saída a estragia da Unión Europea contra Irán.

As sancións adoptadas polos Estados Unidos contra o banco central iraniano prometen ser eficaces: afectan á capacidade de Irán para recibir o pagamento das exportacións de petróleo en dólares.

Estas sancións son capaces de levar a un punto aínda máis incerto a partida de “a que non te atreves” que van xogar Irán e os Estados Unidos, metidos (como Francia), nun ano electoral. O empate por afogamento non está claro. Cabe agardar sorpresas desagradábeis tamén aquí.

3 thoughts on “O prezo do petróleo volve marcar (en euros) o récord histórico de 2008

  1. 13 Xaneiro, 2012 at 7:41 p.m.

    Relacionada con esta, e no contexto español, liamos hoxe que o gasóleo bate máximos históricos. Aínda haberá quen considere que no futuro vai quentar a súa casa con gasoil? Ou que pense que vía trasporte non se vai trasladar a suba do petróleo a todas as demais mercadorías?

  2. 13 Xaneiro, 2012 at 7:44 p.m.

    Segundo o economista-xefe da Axencia Internacional da Enerxía (AIE), Fatih Birol, os altos prezos da enerxía «se persistiren nos próximos meses, poderían facilmente estrangular calquera recuperación económica.»

    Cantas veces leva dito isto Birol e os nosos políticos fan como que non oen? Abonda botarmos unha ollada a este mesmo blog: http://vesperadenada.org/?s=aie

  3. Camba
    14 Xaneiro, 2012 at 10:53 a.m.

    A min o que me parece de alucinar é isto: “En 2011, a factura petroleira da Unión Europea ascendeu a 402.000 millóns de dólares, contra 280.000 millóns en 2010.”

    Seica para isto non fan cumios de emerxencia os nosos amados líderes? Paréceme a min que moito mirar para os papeliños e pouco para a enerxía que ao final é o que move Europa e o resto do mundo.

Deixa una resposta a Camba Cancelar a resposta

O teu enderezo electrónico non se publicará Os campos obrigatorios están marcados con *