O ecoloxismo galego advirte sobre os proxectos de plantas de biomasa en Galiza e os cultivos daniños que levarán asociados

Reproducimos nota de prensa da Federación Ecoloxista Galega do 30 de novembro:

O estudo contempla a plantación de especies como a mimosa ou a paulownia para a súa queima posterior nas plantas previstas

Un estudo do INEGA prevé a utilización a grande escala de cultivos enerxéticos para os proxectos de plantas de biomasa en toda Galicia

As plantas de biomasa precisarían de grandes cantidades de cultivos enerxéticos

Un recente estudo realizado polo Instituto Enerxético de Galicia (INEGA) que ten como título “Análisis de la viabilidad del mercado de biomasa en Galicia y norte de Portugal” recoñece a necesidade da utilización a grande escala de cultivos enerxéticos para os 12 proxectos de plantas de biomasa para producir electricidade que se pretenden instalar no territorio galego. Segundo este estudo dispoñible na páxina web do INEGA, o territorio galego sería un bo lugar para a plantación de grandes superficies de cultivos enerxéticos que queimar nás incineradoras de biomasa. O estudo do INEGA indica tamén que as especies máis apropiadas para os cultivos enerxéticos na Comarca serían especies alóctonas como a Paulownia ou o eucalipto e tamén especies invasoras que levan anos afectando aos montes da galegos como a mimosa, a acacia de madeira negra ou a falsa acacia.

Os cultivos enerxéticos non son unha opción de futuro para o monte galego

O estudo do INEGA considera que un total de 163.486 ha de monte galego poderían ser usadas para a plantación de cultivos enerxéticos en Galicia, cunha produtividade de 1.139.000 Toneladas ao ano.

A FEG lembra que a Xunta está a preparar unha Orde para regular os cultivos enerxéticos en Galiza, que suporía unha gran ameaza para os montes galegos. Os cultivos enerxéticos son aqueles cultivos forestais intensivos que teñen como destino final a súa queima para obter enerxía. O borrador da Orde que prepara a Xunta de Galicia permite realizar plantacións intensivas de alta densidade con extensións de ate 100 hectáreas de especies alóctonas e invasoras como paulownia, o liquidambar, o liriodendron ou o eucalipto.

Esta clase de plantacións enerxéticas precisan de grandes cantidades de abonos, auga e pesticidas, contando tamén con densidades moi elevadas. Deste xeito, estes cultivos resultan moi agresivos co medio debido aos ciclos de corta reducidos de 3 ou 4 anos, degradando o solo e eliminando a súa fertilidade. Por outra banda, os cultivos enerxéticos constitúen un paso máis na perda de biodiversidade dos montes e na desaparición das masas forestais autóctonas.

A FEG oponse de xeito rotundo ás plantacións de cultivos enerxéticos ligadas aos distintos proxectos de plantas de biomasa para producir electricidade que se están tramitando en Galiza na actualidade.

Desde a FEG considérase que as plantas de biomasa para producir electricidade e os cultivos enerxéticos non son solucións para o monte galego. Cómpre apostar por outro manexo fundamentado na multifuncionalidade e no que o silvopastoralismo, a plantación de frondosas ou a compostaxe dos restos forestais sexan as iniciativas a apoiar desde o goberno galego.

2 thoughts on “O ecoloxismo galego advirte sobre os proxectos de plantas de biomasa en Galiza e os cultivos daniños que levarán asociados

  1. 8 Decembro, 2012 at 3:13 p.m.

    Desde logo que é unha tolemia o de cultivar árbores para queimalos e producir electricidade… semella un absurdo desde o punto de vista natural e de rendemento enerxético. Pero se lles dá cartos a curto prazo dalles por saco o deserto contaminado que deixen detrás.

    O que me choca un pouco é que digan que ¿todas? estas especies precisan abono cando algunhas das plantas que menciona a FEG (mimosas, acacias negras e robinias) son leguminosas que sacan o seu nitróxeno do aire e mesmo o fixan no terreo.

    Está visto que queren convertir a nosa natureza nunha fonte de enerxía para exportar aínda que iso implique que deixe de poder sustentar a propia poboación galega. Xa o demostraron co das fumigacións para salvaren os eucaliptos… e non aprenden: véñennos con máis monocultivos o cal implicará entre outras catástrofes naturais, futuras pragas e futuras fumigacións tóxicas.

    Hai que parar estes novos plans delirantes!

  2. Camba
    10 Decembro, 2012 at 6:40 p.m.

    E non será que a Xunta xa dá por perdida a batalla contra o gorgullo do eucalipto e quere ir pasando dun monocultivo basado en 2 especies (piñeiros e eucaliptos) a outro máis variado para tentar minimizar os efectos das pragas ou minorar as perdas que se poidan producir por elas?

Deixa unha resposta

O teu enderezo electrónico non se publicará Os campos obrigatorios están marcados con *