Documental “END:CIV”, de Franklin López, o 7 de agosto na Gentalha do Pichel (Compostela)

Ciclo cinema sobre conflitos medioambientais na Gentalha do Pichel (agosto 2013)Dentro do ciclo de documentais que a Gentalha do Pichel vai proxectar nos seráns do mes de agosto, de temática ambiental e en colaboración con diversos colectivos, Véspera de Nada presentará (en V.O.S. ao portugués) a película END:CIV do director portorriqueño Frankling López (2011). Será o mércores 7 de agosto ás 22:00 h na terraza da Gentalha, na rúa Santa Clara 21, e tras a proxección haberá un pequeno coloquio no que participaremos tamén desde Véspera de Nada.

Cartel de END:CIVA película está baseada principalmente na obra en dous volumes Endgame, do escritor e activista Derrick Jensen. Jensen fai unha crítica demoledora da civilización industrial, que el identifica como o maior problema da humanidade, e ao mesmo tempo das tépedas respostas do movemento ecoloxista, que el xulga como ineficaces e favorecedoras do mantemento do statu quo. Para Jensen e outros autores afíns que participan tamén no documental, o obxectivo urxente debe ser demoler o antes posible a actual civilización para asegurar o máis posible a supervivencia humana e dos demais seres vivos tras a súa fin. O documental repasa algunhas loitas ambientais na América do Norte e a participación das poboacións indíxenas, e cómo a súa cosmovisión os empuxa a unha defensa frontal e física fronte ao sistema. Pero non só a cultura indíxena é unha base para a crítica política, cultural e antropolóxica de Jensen así como para as súas propostas, senón que o autor estadounidense atopa na cultura popular occidental e na historia do século XX analoxías moi potentes que mobilicen a minoría consciente do desastre ao que nos aboca a civilización industrial axudada polos Estados capitalistas. Como non podía ser doutra maneira, o teito do petróleo ten unha presenza importante na análise que se fai no filme da proceso actual de colapso destrutivo da civilización, así como as saídas á desesperada que tenta o sistema industrial para continuar a súa imposible marcha en busca dun crecemento infinito para se perpetuar.

O director, Frank López, ten producido interesantes documentais, series para Internet e participado no programa Democracy Now! da xornalista Amy Goodman. Nas súas obras pódese observar un posicionamento radical e libertario. O seu web é http://submedia.tv/

Derrick Jensen é un autor cunha importante influencia dentro do movemento anarcoprimitivista, ecoanarquista e do que se ten chamado a ecoloxía radical ou profunda. Xunto con outros dos participantes neste documental ten artellado a Deep Green Resistance, un web que aboga pola acción directa e ofrece consellos para activistas e colectivos que queiran seguir, como eles defenden, unha liña clandestina (underground) máis alá da non-violencia (existe unha presentación en portugués deste proxecto).

Para saber máis pódense visitar os webs que ligamos e tamén as Premisas da crítica á civilización que fai Derrick Jensen, e outros extractos da súa obra Endgame, algúns dos cales están traducidos a outros idiomas (as súas Premisas tamén están traducidas ao castelán, aínda que non aparezan correctamente ligadas: animámosvos a lelas como aperitivo antes de verdes a película).

Para as persoas que non poidan asistir ou para as que queiran irlle botando unha ollada ofrecemos como adianto unha versión subtitulada ao castelán, aínda que advertimos que a tradución é bastante deficiente. Para esta proxección que imos facer na Gentalha o vindeiro mércores, a Asociación Touda fixo unha revisión dunha tradución previa ao portugués do Brasil facilitada polo propio director do filme, e a Comisión de Medios da Gentalha botou unha man coa resincronización dos subtítulos.

Descargar o folleto do ciclo completo na Gentalha coas sinopses de todas as películas que se han proxectar.

2 thoughts on “Documental “END:CIV”, de Franklin López, o 7 de agosto na Gentalha do Pichel (Compostela)

  1. 7 Agosto, 2013 at 9:16 a.m.

    Para mellor comprendermos a mensaxe do filme, convén coñecermos qué entende Jensen por civilización:

    I would define a civilization much more precisely, and I believe more usefully, as a culture—that is, a complex of stories, institutions, and artifacts— that both leads to and emerges from the growth of cities (civilization, see civil: from civis, meaning citizen, from Latin civitatis, meaning city-state), with cities being defined—so as to distinguish them from camps, villages, and so on—as people living more or less permanently in one place in densities high enough to require the routine importation of food and other necessities of life.

  2. 10 Agosto, 2013 at 12:08 p.m.

    Tenéis información sobre Deep Green Resistance en español en http://www.resverpro.org

Deixa unha resposta

O teu enderezo electrónico non se publicará Os campos obrigatorios están marcados con *