Teo sen petróleo

O 26 de Agosto de 2009 o concello galego de Teo converteuse no primeiro do noso país (e tamén de todo o Estado Español, aínda que segunda entidade local tras o cabildo de La Palma) en recoñecer oficialmente o Teito do Petróleo. A resolución que foi aprobada cos votos favorables do BNG e abstencións do resto de grupos políticos da cámara municipal, comprométese a tomar as seguintes medidas:

Recoñecermos como administración a gravidade da cuestión do teito do petróleo e a necesidade de adoptar medidas que conduzan a afortalar o noso concello para resistir as súas consecuencias, tanto no plano social como económico e dos servizos públicos.

Realizar os contactos precisos para a constitución en colaboración coa concellalía de medioambiente dun comité técnico na materia, para a realización dun estudo da vulnerabilidade de todos os aspectos da vida do concello fronte a esta ameaza, e colaborar cos recursos ao alcance do concello na elaboración do estudo.

Estudar a aplicabilidade das medidas adoptadas noutros lugares do mundo por concellos de características análogas.

Integrar todas estas accións nun Plan de Transición Enerxética Local que teña como obxectivo evitar na maior medida posible os impactos para os veciños, as empresas e a propia administración local de Teo dunha carencia de petróleo barato, avaliando e reducindo a nosa dependencia do petróleo en todas as áreas, nomeadamente na alimentar, e camiñando con decisión cara unha economía sostible no noso municipio.

Informar desta cuestión aos nosos veciños e empresas e invitalos a participar na elaboración do devandito Plan.

Comunicar aos demais concellos galegos a través da FEGAMP a nosa resolución, convidando aos mesmos a adoptar similares medidas e a cooperar para a adopción de estratexias comúns a nivel galego.

Solicitar dos parlamentos galego e español que constitúan grupos de estudo multidisciplinares para analizar a vulnerabilidade que a eses niveis existe e para deseñar medidas no menor tempo posible, como se ten feito noutros países como Suecia, Irlanda, Escocia e Australia.

Martiño Noriega respondeu en setembro dese mesmo ano a unhas cuestións que lle prantexamos desde a nosa organización, nunha entrevista que se pode ver neste mesmo blog. Dela entresacamos algunhas frases:

O Concello de Teo é consciente da ameaza do teito do petróleo porque ten un ollar crítico co modelo social que nestes intres é o que marca a pauta mais sobre todo porque intenta escoitar ás redes cidadáns que teñen cousas que decir.
(…)
Agardamos que esta iniciativa que se ven de aprobar axude a sensibilizar ás distintas administracións dunha problemática real como é esta e aporte un efecto catalizador na toma de posición doutros concellos semellantes.
(…)
Coido que a declaración foi un punto de partida e que agora toca colaborar activamente cos movimentos sociais. O Concello ten que saber que agora toca neste tema acompañar e non tutelar (…)
(…)
visualizo un Concello que recorte o gasto en petróleo e derivados, que promova campañas de concienciación cidadán, que poida defender un transporte público autonómico digno e que aposte polo emprego de enerxías alternativas.

O 27 de Abril de 2010 formouse o Comité Técnico que se ha encargar de elaborar un Estudo de Vulnerabilidade do concello ao Teito do petróleo, así como un Plan de Medidas para o descenso enerxético.

Na segunda xuntanza deste Comité celebrada en xuño de 2010 fóronse concretando avances en canto a difusión do problema entre os veciños e entre o resto de concellos galegos.

Nunha nova xuntanza en xuño de 2013 presentouse unha serie de medidas de actuación urxente, deseñadas por Véspera de Nada, que o alcalde amosou a intención de elevalas ao pleno.