Guía para o descenso enerxético: 40 días para comezarmos a mudar un país

Onte ás 22 h deu comezo oficialmente a campaña de financiamento colectivo (crowdfunding) para facer realidade un libro co que queremos marcar un antes e un despois en Galiza. A Guía para o descenso enerxético, un proxecto longamente preparado pola nosa asociación, quere ser un punto de partida para poñer mans á obra a unha minoría pioneira de galegas e galegos no labor de construír unha Galiza pospetróleo. Máis cedo que tarde o noso país vai ter que afrontar unha transformación radical de todas as súas estruturas sociais e económicas, actualmente deseñadas para funcionar a base —en gran medida— de enerxía fósil. A Galiza do futuro deberá funcionar con moita menos enerxía e totalmente renovable. Por iso e porque non podemos permitir que o desleixo dos nosos gobernantes nos leve a un suicidio como pobo, debemos construír esa nova Galiza desde baixo, desde as vidas de cada un e unha de nós, desde as nosas comunidades (aldeas, barrios…), colectivos sociais e pequenas empresas. A nosa Guía quere ser unha axuda decisiva para orientar esa transformación social. Convidámosvos a coñecer o proxecto, facelo chegar á vosa xente e unirvos a el para facérmolo posible entre todos: só temos 40 días…